خىتاي تاشقى ئىشلار مىنىستىرى باياناتچىسى چىن گاڭ بۈگۈن بايانات بېرىپ، «بىز ھەرقانداق بىر دۆلەتنىڭ رابىيە قادىرنىڭ بۆلگۈنچىلىك ھەرىكەتلىرىگە مەيدان ھازىرلاپ بېرىشىگە قارشى تۇرىمىز » دېدى. چىن گاڭ بۇ سۆزنى ئاۋسترالىيە فىلىم فېستىۋالىدىكىلەر «خىتاي ھۆكۈمىتى بىزگە ئۇيغۇر پائالىيەتچىلىرىگە ئائىت فىلىمنى كۆرسەتمەسلىك ھەققىدە بېسىم ئىشلەتتى، دەپ خىتاينى ئەيىبلىگەندىن كېيىن ئوتتۇرىغا قويدى.
ﻣﯘﺧﺒﯩﺮﯨﻤﯩﺰ ﺋﯩﺮﺍﺩﻩ
2009.07.16
خەۋەرلەردىن قارىغاندا، خىتاي ھۆكۈمىتى ئاۋسترالىيىدە ئېچىلىۋاتقان مېلبورن فىلىم فېستىۋالىدا قويۇلىدىغان رابىيە قادىر خانىم تونۇشتۇرۇلغان ھۈججەتلىك فىلىمنى بۇ قېتىملىق فېستىۋالدىن چېكىندۈرۈشنى تەلەپ قىلغان. بۇ فىلىمدە رابىيە قادىر خانىمنىڭ ھاياتى تونوشتۇرۇلغان بولۇپ، فىلىم جېف دانىيالس تەرىپىدىن ئىشلەنگەن.

فېستىۋالنىڭ تەشكىللىگۈچىسى رىچارد مورنىڭ ئا ب س رادىئوسىنىڭ مۇخبىرىغا دەپ بېرىشىچە، بىر خىتاي دىپلوماتى رىچارد مورغا تېلېفون قىلىپ رابىيە قادىرنىڭ بىر جىنايەتچى ئىكەنلىكىنى، شۇڭا ئۇلارنىڭ بۇ فىلىمنى دەرھال فېستىۋالدىن چېكىندۈرۈشى كېرەكلىكىنى ئېيىتقان. ئەمما رىچارد مور بولسا، ئۇ دىپلوماتقا ئۇنىڭ بۇ فىلىمنى باھالاش سالاھىيىتى يوقلۇقىنى ئېيىتپ تېلېفوننى قويۇۋەتكەن.

بىراق، خىتاي تاشقى ئىشلار مىنىستىرلىقىنىڭ باياناتچىسى چىن گاڭ بۈگۈن بەرگەن باياناتىدا، ئۆزلىرىنىڭ ئاۋسترالىيىدىكى خىتاي دىپلوماتى ئارقىلىق ئاۋسترالىيە فېلىم فېستىۋالىغا بېسىم ئىشلەتكەن ‏- ئىشلەتمىگەنلىكى ھەققىدە ئېنىق ئىپادە بىلدۈرمىگەن.