ئۇيغۇر مىللىي داۋاسىنىڭ رەھبىرى، دۇنيا ئۇيغۇر قۇرۇلتىيىنىڭ رەئىسى رابىيە قادىر خانىمنىڭ گېرمانىيىلىك يازغۇچى ئالېكساندىر كاۋالىئۇس تەرىپىدىن قەلەمگە ئېلىنغان گېرمان تىلىدىكى بىئوگىرافىيىسىنىڭ ئىنگىلىزچە تەرجىمىسى، ئامېرىكا كالېس نەشرىياتى تەرىپىدىن نەشر قىلىندى. «ئەجدەرھا بىلەن كۈرەشكۈچى» دېگەن ماۋزۇدىكى 426 بەتلىك كىتابقا يەنە «بىر ئايالنىڭ خىتاي بىلەن بولغان كۈرەش داستانى» دەپ قوشۇمچە ماۋزۇ قويۇلغان.
ﻣﯘﺧﺒﯩﺮﯨﻤﯩﺰ ﺋﻪﺭﻛﯩﻦ
2009.04.17
كىتابتا رابىيە قادىر خانىمنىڭ ئالتاي ۋە ئاقسۇدىكى ھاياتى، ئىگىلىك تىكلەش، خىتاي سىياسى قاتلىمىغا كىرىش، ئۇيغۇرلارنىڭ ھوقۇقىنى قوغداشقا ئاتلىنىش ۋە قولغا ئېلىنىش جەريانىدىكى سەرگۈزەشتىلىرى بايان قىلىنىدۇ. كىتابنىڭ كىرىش قىسىمىغا تىبەت روھانىي داھىيسى دالاي لاما بېغىشلىما يېزىپ بەرگەن.

كىتابنىڭ ئارقا مۇقاۋىسىغا سابىق ئامېرىكا پرېزىدېنتى جورج بۇش، ئامېرىكا ئاۋام پالاتا رەئىسى نەنسى پەلۇسى، ئامېرىكىنىڭ سىياسى ۋە كىشىلىك ھوقۇق سەھنىسىدىكى بەزى مەشھۇر شەخسلەرنىڭ باھاسى كىرگۈزۈلگەن. نەنسى پەلۇسى باھاسىدا مۇنداق دەيدۇ»:رابىيە قادىر ئۇيغۇر خەلقىنىڭ كىشىلىك ھوقۇق چىمپىيونى. ئۇ ئۆز داۋاسى ئۈچۈن ھاياتىنىڭ 5 يىلىنى دەھشەتلىك تۈرمە شارائىتىدا ئۆتكۈزگەن. ئۇنىڭ خىتاي ئەركىنلىك، كىشىلىك ھوقۇق ئىشلىرىدا كۆرسەتكەن ھارماس تىرىشچانلىقى، تۆلىگەن مۆلچەرلىگۈسىز بەدەللىرىگە رەخمەت ئېيتىمىز.»

ئۇنىڭغا يەنە سابىق پرېزىدېنت بۇشنىڭ 2007 ‏ – يىلى 6 ‏ – ئايدا پراگادا سۆزلىگەن رابىيە قادىر خانىم ھەققىدىكى سۆزى كىرگۈزۈلگەن. بۇش » رابىيە قادىرغا ئوخشاش تالانت ئىگىلىرى ئۇلار ياشىغان دۆلەتلەرنىڭ زور بايلىقى. ئۇلار بۇ دۆلەتلەرنىڭ ھەربىي قورال – يارىقى ۋە يەر ئاستى نېفىت بايلىقىدىنمۇ قىممەتلىك،» دېگەن ئىدى.