دۇنيا ئۇيغۇر قۇرۇلتىيى ئوچۇق خەت ئېلان قىلىپ، خىتاي رەئىسى شى جىنپىڭنىڭ گېرمانىيە زىيارىتى، گېرمانىيە باش مىنىستىر مېركىلنىڭ كۈنسايىن يامانلىشىپ كېتىۋاتقان ئۇيغۇر كىشىلىك ھوقۇق مەسىلىسىنى ئوتتۇرىغا قويۇش ئۈچۈن بىر پۇرسەت ئىكەنلىكىنى بىلدۈردى.
د ئۇ ق رەئىسى رابىيە قادىر خانىم تەرىپىدىن قەلەمگە ئېلىنغان ئوچۇق خەتتە: «مېركىلغا چاقىرىق قىلىپ، سىزنىڭمۇ خەۋىرىڭىز بولغاندەك، شى جىنپىڭ خىتاي خەلق جۇمھۇرىيىتىنىڭ پرېزىدېنتلىق ئورنىغا ئولتۇرغان بىر يىلدىن بۇيان، ئۇيغۇر كىشىلىك ھوقۇق ۋەزىيىتى پەۋقۇلئاددە ناچارلىشىپ كەتتى. ئاياللار ۋە بالىلارنى ئۆز ئىچىگە ئالغان يۈزلەرچە ئۇيغۇر خالىغانچە قولغا ئېلىندى، خىتاي دائىرىلىرى تەرىپىدىن سوئال-سوراقسىز ئۆلتۈرۈلدى، خىتاي ھۆكۈمىتى بولسا بۇ جىنايەتكە ئىشتىراك قىلدى» دەپ كۆرسەتتى.
شى جىنپىڭ ئۆزىنىڭ 3 كۈنلۈك فىرانسىيە زىيارىتىنى ئاخىرلاشتۇرۇپ، جۈمە كۈنى گېرمانىيە كەلگەن.
رابىيە قادىر خانىم يەنە، خىتاي دائىرىلىرىنىڭ ئۇيغۇر مەدەنىيىتى، تىلى، كىملىكى، دىنىي ئېتىقادىنى باستۇرۇشنى كۈچەيتىپ، ئۇيغۇر كۈندىلىك ھاياتىنى پالەچ ھالغا چۈشۈرۈپ قويۇشقا قاراپ كېتىۋاتقانلىقىنى ئاگاھلاندۇرۇپ، ئەگەر بۇ ئۇچۇرۇشتىن ئۈنۈملۈك پايدىلانسا، ئۇيغۇر كىشىلىك ھوقۇق ۋەزىيىتىنى ياخشىلاش ۋە كاپالەتلىك قىلىش ئۈچۈن زور ئەھمىيەتكە ئىگە، دېگەن.