خىتاي دائىرىلىرى بۈگۈن مۇستەقىل تەتقىقاتچى ئىلھام توختىنىڭ «دۆلەتنى پارچىلاشقا ئۇرۇنۇش» جىنايىتى بىلەن قولغا ئېلىنغانلىقىنى رەسمىي ئۇقتۇردى.
ئۇقتۇرۇش ئىلھام توختى 15-يانۋار كۈنى بېيجىڭدىكى ئۆيىدىن تۇتقۇن قىلىنىپ توپ-توغرا 41 كۈن بولغاندا ئېلان قىلىندى.
خەۋەردىن كېيىن، دۇنيا ئۇيغۇر قۇرۇلتىيى رەئىسى رابىيە قادىر خانىم مەخسۇس بايانات بېرىپ، خىتاي ھۆكۈمىتىنىڭ ئۆزىنىڭ كۆز قارىشىنى تىنچ يول بىلەن ئىپادە قىلىپ كېلىۋاتقان ئاكادېمىك ئىلھام توختىنى قولغا ئالغانلىقىنى قاتتىق ئەيىبلىدى ۋە خىتاي ھۆكۈمىتىدىن ئىلھام توختىنى شەرتسىز ۋە دەرھال قويۇپ بېرىشنى تەلەپ قىلدى.
دۇنيا ئۇيغۇر قۇرۇلتىيى باياناتچىسى دىلشات رىشىت ئەپەندى، ئۆز نارازىلىقىنى قارشىلىق ھەرىكەتلىرى ئارقىلىق ئىپادىلىگەنلەرنى تېررورچى دەپ ئەيىبلىگەن خىتاي ھۆكۈمىتىنىڭ، خەلقنىڭ نارازىلىقىنى ئوچۇق ھالدا تىنچ يول بىلەن ئىپادىلىگەن بىر ئاكادېمىكنىمۇ «دۆلەتنى پارچىلاش» بىلەن ئەيىبلەپ قولغا ئېلىشى خىىتاي ھۆكۈمىتىنىڭ ئۇيغۇر ئېلىدىكى ئەسلى مەقسىتىنىڭ جىمىقتۇرۇپ يوقىتىشتىن باشقا نەرسە ئەمەسلىكىنى كۆرسىتىپ بېرىدۇ، دېدى.
ئىلھام توختىنىڭ رەسمىي ھالدا قولغا ئېلىنغانلىق خەۋىرى خەلقئارا مەتبۇئاتلاردىمۇ كەڭ ئورۇن ئالدى. بۈگۈن ب ب س، ئەل-جەزىرە، رويتېرس ۋە بىرلەشمە ئاگېنتلىقى قاتارلىق نوپۇزلۇق ئاخبارات ئورگانلىرى بىردەك بۇ خەۋەرگە ئورۇن بەردى.